Pōti Kāwanatanga ā-Rohe 2022

Ia toru tau whakatūria ai te pōtitanga hei kōwhiri mā tātou i te hunga ka whakatau i ngā kaupapa mō te anamata o tō tātou tāone nui. Hei te Whiringa-ā-nuku (Oketopa) i tēnei tau ngā pōti kāwanatanga ā-rohe.

He ara tēnei hei kōwhiri māu i te kaunihera ka whai whakaaro ki te katoa o tō tātou hapori.

Ina hiahia āwhina koe, waea mai ki 0800 922 822

He aha ia te take mō te tuku pōti kaunihera?

E mōhio whānuitia ana te wāhi ki te kaunihera ki te tiaki i ngā tūāhanga pērā i te wai, i ngā rori, i te para me te hangarua. Engari arā atu anō ā mātou mahi! Ka whakahaere mātou i ngā whare pukapuka, i ngā pokapū hapori me ngā papa rēhia papai hei tūhura māu. Ka tiaki mātou i ā koutou mōkai, ka whakatū mātou i ngā momo taiopenga papai pērā i Te Taiopenga o Te Papa Rēhia o Wikitōria me te Taiopenga Ahurea. Ka whakamahere i te anamata e tōnui tonu ai a Papaioea.

He riterite tonu ngā hui a te Kaunihera (ko te Rāapa (Wenerei) tō mātou rā hui), ki te whakatau i ngā take ka pāpā atu ki a koe me ō mahi o ia rā. Ko te tuku pōti tētahi ara hei tautoko māu i ngā kaikaunihera o nāianei me ā rātou mahi, hei tautoko rānei i ngā kanohi hou kia tū hei kaikaunihera, inā he rite ō rātou whakaro ki ōu.

Ngā tūranga ka pōtihia

Tekau mā ono ngā tūranga ka pōtihia i tō tātou kaunihera nei o Papaioea:

  • Ko te Kahika (ka pōtihia e te katoa)
  • 15 Ko ngā Kaikaunihera (Ko te rohe pōti o Te Pūao Māori e 2 ngā kaikaunihera mō te katoa o te tāone nui, Ko te rohe pōti whānui o Te Hirawanui, 13 ngā kaikaunihera mō te katoa o te tāone nui)

He rohe pōti hou Te Pūao Māori i te 2022.

Mēnā ka hiahia koe ki te pōti i ngā tāngata e tū ana i te rohe pōti Māori, me whakauru ki te rārangi pōti Māori. Mēnā i pōti koe i tētahi o ngā rohe pōti Māori i te pōti kāwanatanga ā-motu o mua tata nei, he aunoa tō whakauru ki te rārangi pōti Māori mō tēnei pōtitanga ā-rohe. Me he whakapapa Māori tōu, ā, ko tēnei tō pōtitanga tuatahi, kei a koe te kōwhiri i te rārangi pōti Māori, i te rārangi pōti Whānui rānei i te wā ka whakauru koe. Me whakawhiti kōrero ki ō whakaruruhau hei āwhina i a koe ki te whakatau i tēnei kōwhiringa. Hei te 2024 rā anō pea te wā ka taea te rārangi pōti te kōwhiri anō.

Te Kaunihera ā-Takiwā o Manawatū-Whanganui (Horizons)

He rerekē te mahi a Te Kaunihera ā-Takiwā i ā mātou nei mahi. Ko tā rātou aronga matua ko te tiaki i te taiao.

Ko te hanga o Te Kaunihera ā-Takiwā:

  • Ko te rohe pōti Māori Tonga/Raki (1 te kaikaunihera)
  • Ko ngā rohe pōti whānui o Papaioea (e 4 ngā kaikaunihera).

Ngā Rūnanga Hauora

Kāore e pōtihia he rūnanga hauora i te tau 2022, inā te panoni a te kāwanatanga i te rāngai Hauora.

 

Kei a wai mā te manapōti?

Kei a koe mēnā 18 ō tau, pakeke ake rānei.

Mēnā he kirirarau koe, he kirinoho rānei o Aotearoa, ā, e noho ana koe ki Papaioea, kei a koe te mana ki te pōti mō Te Kaunihera o Papaioea.

Ehara i te mea me whai rangatiratanga ki tōu ake whare e whai manapōti ai koe.

Me whakauru tō ingoa ki te rārangi pōti i mua i te katinga ā te Rāmere (Paraire) te 12 o Hereturikōkā (Ākuhata) 2022, e whiwhi manapōti ai koe.

Ka whai manapōti ia tangata o tō kāinga ina tutuki ngā paearu o runga nei.

E wātea ana te whakaurunga ki te rārangi pōti mēnā:

  • 18 ō tau, pakeke ake rānei
  • He kirirarau o Aotearoa koe, he kirinoho pūmau, he kirinoho whai kōkota rānei
  • Kotahi tau, roa ake rānei tō noho moroki tonu ki Aotearoa i tētahi wā i mua

*Me he tangata Māori koe nō Ngā Kuki Airani, nō Niue, nō Tokelau, nō Ahitereiria rānei, e wātea ana tō whakaurunga ki te rārangi pōti mēnā kotahi tau, roa ake rānei tō noho ki Aotearoa, ahakoa kāore anō koe kia whiwhi mana kirinoho.

Atu i te Rāmere (Paraire) te 15 o Hōngongoi (Hūrae) 2022 ki te Rāmere (Paraire) te 12 o Hereturikōkā (Ākuhata) 2022, e wātea ana te rārangi pōti hei tirotiro māu i ēnei wāhi nei:

  • Te Pokapū Ratonga Kiritaki, Te Whare Raraupori Matua, Te Kaunihera o Papaioea, 32 The Square, Papaioea;
  • Te Whare Pukapuka Matua, 4 The Square (te taiwhanga o Aotearoa me Te Moana-nui-a-Kiwa)
  • Ngā whare pukapuka o Otangaki, o Roslyn, o Awapuni, o Linton, me Te Whare Pukapuka Hāereere

Ko tō pōti tuatahi tēnei? Kua panoni rānei tō tauwāhi noho?

  • Whakaotia te puka e hāngai ana i tētahi toa poutāpeta
  • Waea atu ki 0800 ENROLNOW (0800 36 76 56)
  • Toro atu rānei ki te paetukutuku a te Kōmihana Pōti vote.nz

Arā tētahi atu huarahi e whai manapōti ai koe.

Mēnā kei waho o Papaioea koe e noho ana, engari nōu anō tētahi whare, tētahi pito whenua rānei i Papaioea, tērā pea ka whaimana koe ki te pōti i Papaioea. Tirohia te Puka Whakauru mō ngā Rārangi Kaiutu Reiti, kei pncc.govt.nz, me waea atu rānei ki 0800 922 822

 

Me pēhea au e tū ai hei kaikaunihera?

E koa ana mātou mēnā e whakaaro pēnā ana koe!

Ka tuwhera ngā tautapanga atu i te Rāmere (Paraire) te 15 o Hōngongoi (Hūrae) 2022, ki te tūhoetanga o te Rāmere (Paraire) te 12 o Hereturikōkā (Ākuhata) 2022.
I roto i taua wā, ka wātea ngā puka tautapa i ēnei wāhi nei:

  • Te Whare Raraupori Matua, Te Kaunihera o Papaioea, 32 The Square, Papaioea
  • www.pncc.govt.nz
  • Mā te waea atu ki te tari pōti, 0800 922 822

E whaimana ai koe ki te tū, me tutuki ēnei mea e toru nei:

  • He kirirarau koe o Aotearoa
  • Kei te rārangi pōti koe (18 ō tau, pakeke ake rānei)
  • Ka tautapahia koe e ētahi tāngata tokorua kei te rārangi pōti o te rohe e tū nei koe.

Me utu te $200.

Hei te Paengawhāwhā (Āperira) 2022 wātea ai te puka pārongo kaitono.

Me pēhea te tuku i taku pōti?

He māmā noa iho. Kua oti kē i a mātou ngā mahi uaua.

Hei te Rāmere (Paraire) te 16 o Mahuru (Hepetema) 2022 tīmata ai te tuku i ngā pūhera pōti ki ngā tāngata katoa kei te rārangi pōti, mā te poutāpeta. E toru wiki te wā hei tuku pōti māu (atu i te Rāmere (Paraire) te 16 o Mahuru (Hepetema) 2022 ki te tūhoetanga o te Rāhoroi, te 8 o Whiringa-ā-nuku (Oketopa) 2022.

Ko te pōti whakaraupapa (STV) te tikanga pōti mō Te Kaunihera o Papaioea, ko te pōti whiritoa (FPP) te tikanga pōti mō Te Kaunihera ā-Takiwā o Horizons.

I te pōti whakaraupapa (STV) kotahi te tatauranga o ia pōti, engari ka raupapahia e koe ngā tāngata ka hiahiatia e koe. Ka tuhia te 1 ki te taha o tō tino, kātahi ko te 2, te 3, tae atu ki te hia kē rānei ki te taha o ngā mea mātāmuri e pai ana ki a koe. Mā konā e kore ai tō pōti e moumou mēnā he rawaka kē ngā pōti kia whiwhi tūranga ai tō tino.

E tatauria ai tō pōti, me tuku mā te pouaka mēra a DX Mail, me tuku rānei ki tētahi o ngā taupuni pouaka pōti. Tukuna i roto i te kōpaki karaka utukore ka tae atu ki a koe i roto i tō pūhera pōti. He pai hoki te kawe mai i tō kōpaki pōti ki te whare o te Kaunihera.

I mua i tō kōwhiringa, e tika ana kia whai mōhiotanga ki ngā kaitono. Haere ki ngā hui hapori ka whakatūria e mātou, pānuihia ngā kōrero ka puta i ngā momo arapāho pono, me kōrero hoki ki ngā kaitono.

He haumaru te pōti i Aotearoa. Kāore koe e herea ki te whāki i tō pōti, kei a koe te whiriwhiri i tērā. Ka noho matatapu tō pōti.

Ka whakatūria he wāhi pōti mō te hunga pōti motuhake ki Te Whare Raraupori Matua, Te Kaunihera o Papaioea, 32 The Square, Papaioea, atu i te Rāmere (Paraire) te 16 o Mahuru (Hepetema) ki te tūhoetanga o te Rāhoroi, te 8 o Whiringa-ā-nuku (Oketopa).

E tatauria ai tō pōti, me tae mai i mua i te tūhoetanga o te Rāhoroi, te 8 o Whiringa-ā-nuku (Oketopa) 2022.

Ngā Rā Nui 2022

Ka tuwhera ngā tautapanga: Rāmere (Paraire) 15 o Hōngongoi (Hūrae) ki te tūhoetanga o te Rāmere (Paraire) 12 o Hereturikōkā (Ākuhata)

Ka mērahia atu ngā pūhera pōti: Rāmere (Paraire) 16 o Mahuru (Hepetema)

Te wā pōti: Atu i te Rāmere (Paraire) te 16 o Mahuru (Hepetema) ki te tūhoetanga o te Rāhoroi, te 8 o Whiringa-ā-nuku (Oketopa)

Ka pāhotia ngā tapeke whaimana: Rāpare (Tāite) 13 o Whiringa-ā-nuku (Oketopa)

Ka mōhiotia ngā tapeke tōmua hei te tuata o te Rātapu, te 9 o Whiringa-ā-nuku (Oketopa) 2022, ko ngā tapeke whakamutunga hei te Rāpare (Tāite), te 13 o Whiringa-ā-nuku (Oketopa) 2022.

Tirohia ngā tapeke i te paetukutuku a te Kaunihera, i ngā whārangi pāhopori rānei: pncc.govt.nz/elections